نامەیەكی كراوە بۆ سكرتێری گشتیی "رێكخراوی نەتەوە یەكگرتووەكان" لە سەر پرسی كورد و دراوسێ سەرەڕۆكانی و هاوشێوەكانیان.

بەڕێز سكرتێری گشتیی نەتەوەیەكگرتووەكان

جەنابی "بان كی مون" سڵاو.

ماوەیەكی زۆرە ئێوە چاودێرێكی لایەنگیرن و لە پێش چاوتاندا نەتەوەكانتان – ئەوانەی ئێوە بە فەرمی دەیانناسن – خەریكن سەری یەكتر دەخۆن و با ئەوەش بوەستێ‌، ئەوانەش كە ئێوە بە فەرمی نایانناسن و رەسەن و كاراكتەری باشی ناوچەكەن لە پێش چاوی میدیای جیهانیدا سەر دەبڕن كەچی تەنانەت زەحمەتی ناسینەوەی دووبارەیان بەخۆتان نادەن.

لە راستیدا ئێوە باوك و چاوەدێرێكی باشی دنیای پڕمەترسیی ئێستا نین و ئەمەش پیشاندەری ئەو راستییەیە، كۆڵەكەكانی بینای نەتەوە یەكگرتووەكان لەسەر عەرزی بایەخدانی توند و تۆڵ بە مرۆڤایەتی و چاودێریكردن و پاراستنیان لە ئاڵۆزی و كێشە و جەنگ و پاراستنی كەسایەتیی هەموویان بە شێوەیەكی یەكسان دانەنراون.

رێكخراوی نەتەوەیەكگرتووەكان لەپاش دابەشبوونەوەی دنیای پاش شەڕی دووهەمی جیهان شكڵی گرت.

بە بڕوای منی كورد، لە جەنگەكاندا هیچكات حیكمەت دادوەریی نەكردووە و دواتریش نایكات.

ئەوە هەڵپەو پەلامارە رۆڵ دەگێڕێت و دابەشبوونی دنیای دوای جەنگیش لەڕووی حیكمەتەوە نەبوو، بەڵكو لەڕووی هەڵپەوە بوو. بۆیە دیسانەوە دیزاینكردنەوەی دنیا هاتەوە بەر باس و رەخنەی توندی لێگیرا و تەنانەت بۆ هەزارەی نوێش بابەتی : فۆرماتكردنەوەی دابەشكاری و هێڵكاریی جیهان و دیسانەوە داڕشتنەوەی بە گوێرەی پێوەرێكی ئینسانی و دێمۆكراتیك بووەوە بە رۆژەڤ.

ئاوا بڕواتە پێشەوە جیهان بە گوێرەی رێنوێنی و یاساكانی ئێوە ناڕوات.چونكا رێكخراوی نەتەوە یەكگرتووەكان، بووە بە رێكخراوی نەتەوە یەككەوتووەكان(!؟)

یانی رێكخراوی نەتەوەو رەگەزە فەرامۆش كراوەكان نین و ئەمەش وامان لێدەكات داوای مافی شارۆمەندیی جیهانی بكەین و بەردەوام هاناتان بۆ بێنین.

ئەم داوایەش هۆكاری خۆی هەیە.ئێمەتان وەك هاوڵاتیی جیهانەكەتان دانەناوە، ئەگینا بۆ جارێك ناوی ئێمەتان دەبرد.

ئێوە تەنیا زاڵمەكان دەناسن. دەسەڵاتدارە شەڕخوازەكان دەناسن و قسەش هەر لەوان وەردەگرن.

ئێمە دەبینین، دوو دیكتاتۆری زەبەلاحی جیهانی : رووسیا و چین، خاوەنی مافی بێ ئەملاولای ویتۆیەكن كە بە ڕاشكاوی دەیان پڕۆژەی هۆشیارانە و مرۆڤدۆستانەی لە كۆمەڵانی مافخواز و مافخوراوی سەرگۆی زەوی سەقەت كردووە. چونكا ئەوانیش خۆیان بە چەشنێك پێشێلكاری مافەكانی مرۆڤی كۆمەڵگاكەی خۆیانن و باپیرەگەورەی دیكتاتۆرەكانی گۆی زەوی و نوێنەری ئەوان لەسەر عەرزدان و پاڵپشتیش لە دیكتاتۆرەكانی زاڵ بەسەر كوردستانی بندەستەی ئێمە دەكەن و زۆر بە داخەوە ئێوە هەر گوێڕایەڵیان دەبن!؟

 

بەڕێزەكەم!

 

نەتەوەكین, كە دوژمنانمان هەموو رۆژێك بۆ ئەوەی خووخدەیان فەرامۆش نەكەن، لە گۆڕەپانە گەورەكانی شاردا ملمان بە پەتەوە دەكەن و ئێوەش بەردەوام پێمان ئەڵێن: تەسلیم بن... هیچ نییە... چاك دەبن و داوایان لێدەكەین لەگەڵتان مێهرەبان بن.ئەوە نییە زانیارو لوقمانی مرادیی نەوڕەسیان خستووەتە ژێر پەتی سێدارەوەو پێیان وتوون: چاوەڕوان بن تا وەك بەرخ سەرتان دەبڕین!

ئەوە نییە لە سووریای قەسابخانەی عەرەبیدا، بە بێ‌ ئەوەی دان بەوەدا بنێن ئێمە مرۆڤین و ناسنامەشمان پێ ڕەوا ببینن، وەبەر قەنارە و فیشەكمان دەدەن و لەو بەشەی نیشتمانەكەماندا، خوێن زیاتر لە ئاوی ئەم زستانە لە شەقامەكاندا گۆلی بەستووە و جەنابیشت بێدەنگیتان لێكردووە. ئیتر ئێرانیش با بوەستێ‌ كە یەكەمین تاقیكاریی ناوكیی خۆی لە شاری مەریوان دا بە ئەنجام گەیاند و چونكا كوردستان بوو، هیچتان نەفەرموو.

توركیاش كە بە ناوی دیمۆكراسییەوە دەیەوێ‌ هەموو كونی گوێكانی رۆژئاوای لانكەی گەشەی ئازادی بە قوڕ بگرێت و درێژە بە سیاسەتی ئاسیمیلەكردنی 25 ملیۆن مرۆڤی كوردی بندەستەی خۆی بدات.

لە ئێستادا دنیا بە زۆر كێشەو كارەساتی خوێناویدا تێپەڕ دەكات و ئێوە لێیدەگەڕێن و بۆ ماوەیەكی زۆر بەسەریدا تێدەپەڕن و وازدێنن، تا دیكتاتۆرەكان ئەركەكانیان – سەركوت و سەربڕینی ئازادییەكانی مرۆڤ - بە ئەنجام بگەیەنن و دواتر گەمارۆیەك بخەنە سەر وڵاتەكەیان كە خواردەمەنی و سووتەمەنیی خەڵك گران ئەكات و هیچ كاریگەرییەكی ئەوتۆی لەسەر دەسەڵات نابێت و تەنانەت هۆكار و بیانوو دەدەنە دەست دەسەڵات، بۆ ئەوەی سەركوتی زیاتری خەڵكە برسییەكەی خۆی بكات. لە پاش ماوەیەك لە سەركوتی خوێناویش ئێوە تەنیا بەیاننامەیەك دەردەكەن و ئیدانەی جینایەتەكانیان دەكەن. داخۆ ئەو بەیاننامەیەش دەریدەكەن، بە گوێرەی پێویست دەتوانێ‌ كارتێكی فشار بێت بۆسەر دەسەڵاتداری سەرپێچیكار یان نابێت!؟

بەڕای منی كورد، ئێران نابێ‌ بەو شێوە ئیمپراتووریایەی ئێستای درێژە بە سەركوتی گەلان و نەتەوەكانی بندەستی خۆی بدات. حكوومەتی ئێران سەلماندوویەتی كێشە ناوخۆیییەكانی پێ چارەسەر ناكرێت. لە كۆی 6 نەتەوە و چەندین كەمە نەتەوە و ئایینزای جیاواز لە ئێراندا، تەنیا فارسەكانن قازانج دەكەن. كوردیش بەگوێرەی خەباتەكەی لە هەمووان زیاتر زەرەرمەند بووە. چونكا سەدەیەكە، و بە باكگراوەندی 26 سەدەی پێشتریش، لە ژێر پۆستاڵی داگیركەرانی خاكەكەیدا دەشێلدرێت و ئێوەش باشی دەناسن و تەنیا چاو لە وردبوون و داڕمانی پەیكەرەی ئەم نەتەوە رەسەن و هۆشیارەی ناوچەكە دەكەن.

سووریا نزیك بە ساڵێكە، بە باكگراوەندی دەسەڵاتی سەركوتی هەشتا ساڵەی خۆیەوە، خەریكە لە پێش چاوی ئێوە خەڵكەكەی دەكورۆژێت، بەڵام ئێوە بۆ پاراستنی مافی ویتۆی لایەنێكی دیكتاتۆری بەرەڵڵای وەك چین و رووسیا، كە سووریا و كۆماری ئیسلامی ماری بندەستی ئەوانن، خەریكن چاوپۆشی لە سەرەتاییترین مافەكانی مرۆڤی دیاریكراو لە جاڕنامە گەردوونییەكەتاندا دەكەن. ئەو جاڕنامەیەی ئێمەی بە مرۆڤ دانەناوە، چونكا ئێمەی نەپاراستووە.

سووریا لە كۆی دووملیۆن كوردی ئەنفالكراوی خۆی تەنیا بۆ 10% ناسنامەی دەرهێناوە و بۆیان نووسیون : خۆشتان بێ‌ و ترشتان بێت... ئێوە عەرەبن!

توركیای ئەندامی كارای ناتۆ و هاوپەیمانی ناتۆ، هەموو شتی لێ‌ قبووڵ دەكرێت.چونكا تاقیگەیەكی باشە بۆ تاقیكردنەوەی چەكە كۆكوژەكانی ئێوە.

بە ناوی گەشەی عەلمانییەتەوە لە ناخی جیهانی ئیسلامیدا، بۆ یەك سەدەیە، چاوپۆشی لە كردارە دزێوەكانیان دەكەن. بە ناوی سیاسەتی دێمۆكراتیك و كرانەوەی ئۆردووگانی یەوە، هەموو شێوە دەستدرێژییەك دەكرێتە سەر ماڵ و حاڵی ئێمە و مەملەكەتی ئێمەیان كردووە بە گۆمی خوێن و وڵاتی ئازارەكان و هێشتا ئێوە هەر لێیان قبووڵ ئەكەن.

توركیای بەناو دیمۆكراتیك، تەنانەت نایەوێ‌ ئەندام پارلمانەكانی كوردی خاوەن دەنگ و پێگەی جەماوەریی كوردستانییانە، بە زمانی خەڵكەكەی خۆیان قسە بكەن. كەچی ئێوە زۆر بە ئازایەتی وەسفی دەكەن و پشتیوانی لە سیاسەتەكانیان دەكەن كە بە ناوی دیمۆكراسییەوە ویژدانی مرۆڤایەتی لە خاچ ئەدەن.

بڕوامان پێبكەن كە كورد لە خۆشیدا چەكی لە شان نەكردووە، چونكا ئەوەی خۆی نەشاردووەتەوە و ئەوەی پارێزگاری لە خۆی و گەلەكەی نەكردووە، زۆر بە شێوەیەكی دڕندانە بووەتە قوربانی.

 

ئەمانە بەشێكن لە گازندەی تاكێكی هۆشیاری گۆی زەوی و بە داخەوە من و نەتەوەكەمتان لە بەشی شاراوەی گۆی زەویدا چاڵكردووە و دەنگمان بە هیچ كوێیەك ناگات، مەگەر دیسانەوە دیزاینی نوێی جیهان بكرێتەوە. دیسانەوە نەخشەكان سەراوبن بكەن و نەتەوە بنكەوتووەكان بێننەوە ناوەندی پرس و باسەكانەوە.

 

بەڕێزم جەنابی بان كی مون !

 

پێویستە ئیتر جیهان بازدانێكی مێژوویی بە خۆیەوە ببینێ. یانی بە رەنگی ئەو بەرمیلە نەوتانەی ئێمەتان پێ ڕەش كردووەتەوە، دیسانەوە ناوو مێژوو و شارستانییەتی ئێمە بنووسنەوە و بمانخەنەوە ناو بازنەی مرۆڤ بوون.

لە راستیدا پێویستە... ئەڵماسی گرانی پڕبڕشتی ملبڕی نەتەوە و رەگەزە فەوتاوەكان سەراوەبن بكرێت و ئازارەكانی بگەڕێتەوە بۆ خاوەنانی بەرژەوەندی لە مردنی ئێمەدا.

ئێمە دەبێ‌ قەرەبوو بكرێینەوە, یانی ئیتر كێشەی ئێمە بە چاوی كەمایەتییەك لە ناو خاكی ئیمپراتووریایەكی زەبەلاحدا سەیر نەكرێت.

بۆ ئەوەی ئامانجە مرۆییەكانی رێكخراوە جیهانییەكەی نەتەوەكان بێتە دی, پێویستە ئەم گەورەترین نەتەوە بێ دەوڵەتەی جیهان -كە هیچی لە فارس و تورك و عەرەبی زاڵ بەسەر وڵاتەكەیدا كەمتر نییە – بە سەربەخۆیی خۆی بگات.

 

عەلی زیرەك

كوردێكی خەباتكاری ناو جەرگەی ئۆپۆزیسیۆنی

"رۆژهەڵاتی كوردستان"ی بندەستكراوی ئێران

 

...........................................................................

 

تێبینی: ئەم نامەیەم هەر بە زمانی دایكیی خۆم، سەرەتا بۆ جەنابی بان كی مۆن ناردووە، ئەوكات هەوڵی بڵاوكردنەوەییم لە ماڵپەڕ و رۆژنامەكانەوە داوە.

 

لە سەردێڕی ئیمەیلەكەشدا ئەم رستانەی خوارەوەم بە فارسی نووسیوە:

 

- با سلام خدمت شما

 

این نامە را بە زبان کوردی نوشتم

فقط بە این دلیل کە بفهمند

ما یک ملتیم و باید بە حقوق اساسی خویش برسیم.

ما قربانی یک طرح شوم بین المللی هستیم و خواهان استمداد از سازمان ملل هستیم

قضیه ما خیلی از قضیه فلسطین فراتر است.

ما یهودیان صابون شده ی هزارەی نوینیم و خواهان حق جبران خسارات واردە هستیم.

لطفا كمكمان كنيد!

 

 

‌ • نوسه‌ر:عەلی زیرەك