سەمەنگوڵ (شێر فولکلوریک) ئاو سەر سەراوێ، ئاو سەر سەراوێ یە رووژ راگەم کەفت، ئاو سەر سەراوێ دیم ک نیشتگە تەرک تەراوێ

کونە پڕ مەکەی باوان خراوێ

کونە پڕ مەکەی لە دەلیای بێ پەی

پەنجە شمشاڵی قامەت وێنەی نەی

پەنجەی شمشاڵی مەژەن وە ئاودا

وە سەر مەکیشا خەیاتەی خاودا

دڵ نامە گیان سڵامش کەردەم

باڵ چەو هێزدا خوەم رووح سپەردەم

باڵ چەو هێزدا لێو بە خەنەوە

ئەلەیکم وە بان دیدە سەنەوە

واتم تکی ئاو بییە پێم وە دەس و جامت

ئسمت سەنگینەو نازانم نامت

وات جامێ ئاو دەمە پێت وە دەس وە دڵ

ئەسڵم بەگزایەو ناوم سەمەنگوڵ

واتم سەمەنگوڵ دەم نوقڵ و نەوات

وەلات چووی بچم من وە بێ مرات

وات هەزاران چووی تو وەی داخەو مردەن

هوویچکام پەڕەی گوڵ لە لام نەوەردەن

ئەر خەوەر بییەم وە قەوم و کاران

وە تێخ ئاودار پارەت مەکەران

واتم وە تێخ مەکوشەم زامم دیارەن

خەڵکان مەواچان یە گونا کارەن

تاڵێ لەو زوڵفە بنە وە گەردەن

تا باچان وە هوکم ئلاهی مردەن

وات هەفت برا دێرم چووی سێف خونسار

یە داڵگ دێرم چووی هەڵوویچەی دار

یە باوگ دێرم لایق وە خانی

لەکەی رووی سییە ناخەمە شانێ

واتم سەمەنگوڵ شوون باوانت هەزار هەزار بوو

هەر هەزارەگەی رووی وە مەزار بوو

وات ها جوان! مەکە نووڕ باوانم

وە دیدە کوور بیت دەس گریە داوانم

واتم سەمەنگوڵ شوون باوانت وە چەپەی نەی بوو

ئاگر بچووە لێ، شەماڵ لە پەی بوو

وات ها جوان! مەکە نووڕ باوانم

لە دیدە کوور بیت دەس گریە داوانم

واتم سەمەنگوڵ شوون باوانت وە چەپەی سەنگ بوو

هەر لە میلکانێ یەکیێ گوم بوو

وات ها جوان! مەکە نووڕ باوانم

لە دیدە کور بیت دەس گریە داوانم

واتم ماشتەی سوویریەگەت وەر وێڵت بوو

لە پرس براگەت گەشت گیڵت بوو

وات ها جوان مەکە نووڕ باوانم

ئاخر مەگری دەس وە داوانم

ئەر دووس هەزار بوو هەر خوەت یارمی

ئەوەڵ نەو نەچیر نەو شکارمی

واتم سەمەنگوڵ هەرچێ من وەتم گشتێ دروو بوو

یەکیگێ راس نەو، گشتێ چروو بوو.

 

‌ • نوسه‌ر:سیامەک نەجەفی