وە کوو باریم وە کوو بژنەفیم، بییە یە کورپەی بوویچکەلەییگ ک لە سەرمەکانێگ فرەفرە دوویر، سوکنا داشت. سەرمەکان بوویچکەڵە ئەوەقە دوویر بی، ک چەوچەو کار نەکردیا، تا چەو کار کردیا دوویر بی، لە بنار و پایەمان کوویەی زاگورس،

فرە دوویرتر لە کوویە چەرمگ و کوویەی قاف. بوویچکەڵە خوەی تاخ تەنیا زندەگی کردیا. کورپە لە دار دنیا، تەنیا یە هەسارە داشت و یە پەل رەیهان. هەسارە شەوەکیان زووی هاتیا دەیشت نزیک دەم قەڵاچەی بوویچکەڵە، یە دەنگ چڕیا، کورپە، لە قەلاچەی هاتیا دەیشت، لە ناو وەرتارمەگەی نیشتیا، یە بسکەی کەفتیا سەر لێوی و نەخش خەنەیگ لە روومەتێو وەل هەسارەگەیا تا یە ماوڵ قسەگەیلێگ کردیان ک کەس سەرە لێ دەر ناوردیا، بەس دووینسیای بزەی سەر ڵێو بوویچکەڵە جوور گولاخی وەهاران، گوڵوەچ دەر کردگە. هەسارەیش ئەوقە ئەو ناوە مەشخەڵانی کریا ک بنیایەم هەریان تریفەی بیاد. کورپە دوویای ماوڵێگ هەر لە بانجیلەگە لە ژێر تریفە ، وەختی هەسارە داشتیا ئەڕای بەیت وەتیا و گورانی چڕیا و لای لای ئەڕا کورپەی کردیا، خەوی بردیا.

کورپە ناو هەسارەگەی نائوویە هەسارەی رووژ. بوویچکەڵە وەختێ لە خەو هاتیا دی وەجیای تریفە، تین خوەر داخە دیادە پرچ خورمایی و چەو کاڵێ وە خەو کردیادەی. ئەوەڵ چڕیا، هەسارەی رووژ! هەسارەی ژووژ!، جا وختی دیادن ک دی هەسارەی رووژ، نەمەنگەسەی، ئییەیش وە خیاڵێ ک هەسارەی رووژ چییە بخەفێ. جا هەڵسیادن، چیادە لیوە چەم پەڕ قەڵاچەی، دەسدەمێ شووردیادن، هاتیا ناو باخچەگەی، لای رەیهانگەی، تا ئێوارە خوەراوا بیاد وەل رەیهانا بازی کردیاد، ئەڕای ئاو هاوردیادن و هەکایەت ئەڕا یەکتر وەتیان. رەیهان خوەی نەزانستیا ک چووی وەی سەرمەکانە ری کەفتووی. رەیهان جیا لە بوویچکەڵە، یە دووستر داشت، ک گوڵسوو، وەختێ بوویچکەڵە مەشخووڵ هەسارەی رووژ بیاد وەل یە کزەییگ وەهاری بوویە دووس. ئەویش ناو ئەو کزەی گوڵسووە نائوویە سروە. رەیهان یە دەف وە بوویچکەڵە پرسووی ک ئەڕا خوەی تەنیا ها ئێرا، نە شملی، نە رازیانە، نە هەڵاڵە هەس. بوویچکەڵە هوویچکام لە ئیانە نەسیا. تەنیا رەیهان ناسیاد و دڵێ ئەڕا ریهان قرچیادن.

رەیهان هەر چێ گوڵ سووە وەل سروە تەنازی کردیان و سروە لە دنیاییگ تر، لە چنوویر و گونوڕ و ئەزبوولە و گوڵ نەوروز ئەڕا رەیهان باس کردیادن. لە مسافرەتێ وە دەور دنیا. رەیهان گەورا و گەورا بیاد و سروە قەوڵ دائوویە پێ ک یە رووژ وەل خووەیا بووەیدەی، ئەڕا سەرمەکانێک پڕ لە رەیهان و رازیانە، پڕ لە گوڵوەویلکە.

یە رووژ ک رەیهان تووم کردووی، سروە وەتە پێ، دی وەختە، ئامادە بە ک من سوو شەوەکی تییەم بەمەد. رەیهان وە لاییگا خوەشهاڵ بی ک چووە سەرمەکان ئەژادی خوەی، و لە لاییگیشوە دڵێ ئەڕا کوورپە فرە تەنگ بیاد، فکر کردیا ئەر بوویچکەڵە بفامێ ک ئییەی توای بیلێدەی چی، خوو دڵ بوویچکێ دەق کەی. وەلی هوویچ نەوەتو و کەمێ کز بی.

ئەو رووژە ک بوویچکەڵە دەسدەمێ شووردو هاتە لای رەیهان دی رەیهان کزە و خەمێگ نازگ روخسار سەوزی زەرد کردگە. وەتە رەیهان، نازارەگەم، تازە و خوەش بوو و سەرهاڵەگەم، ئیمروو چەتە؟ ئەڕا دڵ و دەماخ نەیری؟ ئەڕا رەنگد زەردوە بییە، تینگدە، ورسگدە، سروە قسەی ناخوەش وە پێت کردگە؟

رەیهان بسکەی زوورەکی خستە روومەتی و وەت، بوویچکەڵە نازانم، چەمە.

بوویچکەڵە وە لای خوەی وەت با ئیمرووژ تەنیا بیلمەی، چی کەمێ ئاو ئەڕای هاورد و چییە ناو قەڵاچە. ئێوارە زووی خەوفت و شەوەکی وەرجلە ئەوە ک هەسارەی رووژ بایدنە وەرتارمەگەی، خوەی چوویە دەیشت و چەوە ری مەنووی.

ئەڕا یەکم جار بوویچکەڵە دی ک هەسارەی رووژ چما لە لێ دوویرەوە کەفتگە و کەم نزوە بییە، هەر چێ چڕیا هەسارە، خاس دەنگێ نەژنەفتیا. بوویچکەڵە خەم زەردێگ روخساری و لوچی چەفتێگ نیشتە تێوڵێ و چەن تکە ئەسر زاییە ناو چەوێو هەناس گەوراییگ کیشاد و خەو کەفتە پێیا.

بوویچکەڵە وەختێ وە خەو هەڵساد، دی دنیا سفێ پووشە، گ لای وەفر چەرمگە. بدەو بدەو چی بزانێ رەیهان چەوە بێ هاتگە، باریدەی ناو قەڵاچە. وەختێ چی دی لاشەی زەرد رەیهان کەفتگە و یە دەنە تووم ئەڕا هیشتگە و ئەو دوویای توومەگە نەمەنگەسەی.

بوویچکەڵە هەرچی گل خوواردیا دی گلای وەفرە. دەس کردیا ناو وەفرەگەیا، دیا سەردە، چما یەکم جار بی ک وەفر دووی.

بوویچکەڵە هاتە ناو قەڵاچی دی دو نەفەر لە ناو قەڵاچە چەوە ریین، و وەتنە پێ، هەی شازایە، پەری خاو خیاڵ، ئیمە دنیا نایمەسە ژێر پا ک تو پەریزای پەیا بکەیم، هەر چێ بتوای دیمنە پیت، گیان بتوای، گیان دیمە پێت، ناز بتوایی نازت کیشیم، بەس وەلمانا بەو.

 

نزیکەیل دەم شەوەکی بی، گوڵسوو، تلیقەی شەوەکی، دیم شازایەی بوویچکەڵەییگ هالە پشت پەنجەرەی ماڵەگەم، وە کلک دریژ و شمشالی، مووی سەر خورمایی، و چەو کاڵێ، تەق تەق دەیدە تەشاوی ماڵم. وەختی چیم دەرەوگە وا کردم، وە بسکەی تەرک و نازگ سەر لێوی، خوەی خستە باوشم، تماشای ناو چەوم کرد و پریکەی خەنینیگ داد و لە باوشم خەوی بردوە.

 

 

 

‌ • نوسه‌ر:سیامەک نەجەفی