چیرۆکیک بۆ مناڵانی ریشدار !! بەسەرهاتی بۆقی قڕقڕکەرە !!

یەکێک هەبو

یەکێک نەبو !

دەگێڕنەوە و دەڵێن

کە گۆلاوێک بو

پڕلە ئاو و گێان‌لەبەر بو

دەورو بەری گوڵ و گوڵزار

لەگ لەگ و کەروێشک بۆق دەگەڵ مار

لەم گۆلاوە ژینیان خۆش بو یەکجار

هونەرمەندی ئەم گۆلاوە

دەڵێن بۆقی ناوە !

قڕەقرو دەنگی خۆشی

هەمو ناوچەی دادەپۆشی !

بەڵام مار هەمو جەمێ

دەیانخوارد بۆقی مێرگ و چەمێ

بۆقیش لە ترسی مار

خۆیان دەشاردەوە زۆرجار !

بەڵام خۆ حەشاردان سودی نەبو

خواردنی بۆقان بەردەوام بوو !

بۆ ڕزگاری لەدەستی مار

بۆق پەنایان بردە لەگ لەگ ناچار !

لەگ لەگ هێرشیان کردە سەر ماران

لێیان خواردن بە هەزاران !

لەگ لەگ ماریان دەخوارد یەک یەک دو دو

لە ترسان مار هەڵاتن بێ سێ و دو !

چونکە لەگ لەگ مانەوە بێ خواردن

ئەمجار لە برسان بەربونە بۆق خواردن !

لەو ڕوداوەی کە ڕوی‌دا

بۆقان هەمو سەریان سوڕما !

خۆزگەی هیندێک بە جاران

دوبەرەکی خستە ناویاران !

بەشێک لە سەر گەڕانەوی مار ڕێک کەوتن

هیندێکیش لە گەل لەگ لەگ کەوتن !

مار و لەگ لەگیش بە یەکەوە

بەربونە خواردنی بۆقەوە !

ئێستاکە بۆق پێیان وایە

کە خواردنی ئەوان ڕەوایە !

بەڵام شتێک لایان نەبو دیار

ئەوەی دەیان خوا دۆستە یا نەیار !؟

 

عەلی ئاشناگەر

 

 

 

‌ • نوسه‌ر:عەلی ئاشناگەر